TEC-et Lundruese
Aseti gjenerues termik është vendosur në zonën e Triportit, Vlorë, pranë TEC Vlora, me një kapacitet të instaluar prej 110 MW, që përdor si lëndë djegëse për gjenerimin e energjisë Heavy Fuel Oil sipas standardit ISO 8217:2017 (RME).
Përmbajtja e squfurit e lejuar: max. 0.5%
Për përballimin e situatës dhe mitikimin e pasojave të krizës energjitike, Qeveria Shqiptare, me Vendimin e Këshillit të Ministrave (VKM) Nr. 620, datë 22 tetor 2021, për “Miratimin e kushteve të Detyrimit të Furnizimit Publik (DFP) për të licensuarit e Sektorit Energjitik Shqiptar, gjatë periudhës së gjendjes së jashtëzakonshme të furnizimit me energji, për të parandaluar dhe përballuar pasojat e krizës globale të energjisë,” e ngarkoi KESH sh.a. me detyrimin që të sigurojë energjinë e nevojshme për të mbuluar kërkesat e Furnizuesit të Shërbimit Universal (FSHU).
Për përmbushjen e këtij detyrimi, KESH duhet të përdorë së pari energjinë e prodhuar nga asetet e veta gjeneruese, duke e kombinuar me marrëveshje shkëmbimi apo depozitimi. Në rast se kërkesa e FSHU nuk mund të plotësohet, KESH do të duhet të blejë pjesën tjetër në tregun e parregulluar.
Përmbushja e DFP-së në kushtet e krizës globale energjitike, të shoqëruar me ngritjen e menjëhershme të çmimeve të energjisë në tregjet rajonale, si dhe varësia e prodhimit të energjisë nga kushtet hidro-meteorologjike, e vendos KESH në një trysni të jashtëzakonshme financiare dhe operacionale.
Për të përmbushur këtë detyrim dhe për të menaxhuar më mirë situatën, KESH duhet të:
- Sigurojë të gjithë sasinë e energjisë së nevojshme për përmbushjen e Detyrimit të Furnizimit Publik, duke synuar mbajtjen e kostove të gjenerimit më të ulëta se çmimet e tregjeve të energjisë.
- Optimizoje prodhimin e energjisë përmes kombinimit të burimeve hidrike dhe termike, duke përmbushur DFP gjatë gjithë vitit, edhe në periudhën e thatë, kur çmimet e energjisë rriten.
- Realizojë të ardhura shtesë nga aktivitetet tregtare në tregun e parregulluar, duke shfrytëzuar mundësitë që ofrojnë çmimet e larta të tregjeve kur ato paraqiten.
- Sigurojë një kapacitet rezervë gjenerues për të garantuar sigurinë e furnizimit të Sistemit Energjetik Shqiptar.
Vendosja e burimeve gjeneruese më afër ngarkesës do të përmirësojë menjëherë profilet e tensionit dhe do të reduktojë humbjet. Për më tepër, i gjithë sistemi rajonal i energjisë do të jetë më i organizuar për të plotësuar ngarkesën e ardhshme përmes një kombinimi të përshtatshëm të objekteve hidro/termike të gjenerimit dhe importit të energjisë elektrike.
Përfitimet dalluese përfshijnë:
- Avantazhe ekonomike, sidomos në rastin e shkëmbimit të energjisë elektrike.
• Përmirësimin e cilësisë së furnizimit me energji elektrike për të gjithë konsumatorët, përmes bashkimit të rezervave të rregullimit primar.
• Rritjen e përgjithshme të performancës së sistemit të energjisë përmes shkëmbimit të informacionit dhe praktikave më të mira.
Instalimi i këtij impianti me gjenerim termik kontribuon në një furnizim më të sigurt me energji elektrike, i cili është i nevojshëm për të plotësuar kërkesën në rritje të konsumatorëve dhe për të përmirësuar cilësinë dhe besueshmërinë e energjisë.
Aseti gjenerues termik ka për detyrë:
- Të mbajë në gatishmëri (disponueshmëri) maksimale të impiantit për të gjeneruar energji.
II. Të përpiqet të arrijë efikasitetin më të lartë të mundshëm dhe kapacitetin më të lartë të prodhimit të energjisë nga impianti, si dhe të kryejë investime në përmirësime teknologjike.
III. Të mbajë nën kontroll kufijtë e emetimit, si gazrat dhe shkarkimet e lëngshme.
IV. Të shqyrtojë të gjitha mundësitë në tregun e energjisë për të shfrytëzuar intervalet e leverdisshme.
Të dhëna teknike:
Dy anijet termocentral përbëhen nga një total prej 17+2 setesh gjenerimi prej 6 MW secila që janë prodhuar nga Wartsila model 18V32LN.
Në Tiger 1 kemi 9 sete gjenerimi, në Tiger 3 kemi 10 sete gjenerimi, në kushte normale punojnë 17 sete gjenerimi dhe 2 mbahen rezerva.
Performanca e impiantit konsiston në kapacitetin e prodhimit të energjisë prej 110,000 kW ose 137,500 kWa me faktor fuqie 0.8.
