Organet Kolegjiale

Shoqëria KESH sh.a është shoqëri aksionere me kapital të zotëruar 100% nga Shteti Shqiptar (përfaqësuar nga Ministria e Infrastrukturës dhe Energjisë) sipas aktit të themelimit datë 17.10.1995, regjistruar në Gjykatën e Rrethit Tiranë me Vendimin Nr. 12728, datë 06.11.1995.

Asambleja e Përgjithshme, bazuar në nenin 135 e vijues të ligjit Nr. 9901, datë 14.04.2008 “Për tregtarët dhe shoqëritë tregtare” i ndryshuar si edhe të statutit të KESH sh.a, është organi më i lartë vendimmarrës i shoqërisë KESH sh.a. dhe përfaqësohet nga Ministria e Infrastrukturës dhe Energjisë.

Asambleja e Përgjithshme

Në mbështetje dhe zbatim të Ligjit Nr.9901, datë 14.4.2008 “Për tregtarët dhe shoqëritë tregtare”, i ndryshuar, Vendimit Nr.570, date 3.10.2018 “Për këshillat mbikqyrës të shoqërive aksionare shtetërore”, numri i anëtarëve të Këshillit Mbikqyrës të KESH sh.a., si shoqëri pjesë e sektorëve strategjikë do të jetë 6. Anëtarët e Këshillit Mbikqyrës të KESH sh.a., emërohen në detyrë nga Ministria e Infrastrukutrës dhe Energjisë në cilësinë e Asamblesë së Përgjithshme të shoqërisë.

Këshilli Mbikqyrës

Disa nga kompetencat kryesore të Këshillit Mbikëqyrës janë:

1
Emëron Administratorin
2
Miraton programet vjetore si dhe veprimtarinë afatshkurtër, afatmesme dhe afatgjatë të Shoqërisë.
3
Miraton llogaritë vjetore dhe raportin vjetor të paraqitur nga Administratori i shoqërisë.
4
Ushtron kontroll të përhershëm për administrimin e shoqërisë prej Administratorit të saj dhe i jep atij autorizimet për kryerjen e operacioneve që Administratori nuk mund t’i kryejë pa autorizim paraprak të Këshillit.

Kryetar : Znj. Evis Mamaj

  • Afati i emërimit : 05.04.2022 – 04.04.2025
BIO

Anëtar: Z. Arian Hoxha

  • Afati i emërimit: 18.10.2023 – 17.10.2026
BIO

Anëtar: Znj. Kledia Ngjela

  • Afati i emërimit: 27.01.2023 – 26.01.2026
BIO

Anëtar: Z. Luigj Pjetri

  • Afati i emërimit: 04.07.2024 – 03.07.2027
BIO

Anëtar: Z. Ylber Muceku

  • Afati i emërimit: 14.10.2021 – 13.10.2024
BIO

Anëtar: Znj. Olta Manjani

  • Afati i emërimit: 29.08.2023 – 28.08.2026
BIO

Kontakte

+355 42 230 888
info@kesh.al

Adresa

Rr. Viktor Eftimiu, Nr. 12, Tiranë
Kryetare, Këshilli Mbikqyrës KESH

Evis Mamaj

Evis Mamaj mban pozitat e Drejtorit të Drejtorisë së Buxhetit dhe Menaxhimit Financiar që nga 18 qershori 2019. Ajo ka një karrierë të gjatë në menaxhimin financiar, buxhetim, raportim financiar dhe kontroll të brendshëm, duke punuar më parë si Nëpunës Zbatues pranë shoqërisë Albcontrol sha dhe në Bashkinë e Tiranës.

 

Mamaj është diplomuar në Fakultetin e Ekonomisë, Universiteti i Tiranës, në Financë-Kontabilitet (2000). Ka përfunduar studime pasuniversitare si “Specialist i Lartë i Financës – Bankës” (2002) dhe ka marrë titullin “Kontabilist Publik dhe Audit” nga CIPFA në Mbretërinë e Bashkuar (2006). Në vitin 2021, ajo është certifikuar si “Auditues Ligjor” nga Instituti i Ekspertëve Kontabël të Autorizuar.

Anëtar, Këshilli Mbikqyrës KESH

Arian Hoxha

Arian Hoxha është Këshilltar i Ministrit të Infrastrukturës dhe Energjisë në Shqipëri që prej vitit 2013, ku ka mbajtur pozita si Drejtor i Politikave të Zhvillimit për Industrinë dhe Drejtor i Njësisë së Menaxhimit të Projekteve për Rimëkëmbjen e Energjisë. Ka përfunduar studimet në Ekonomi për Industrinë dhe ka tre tituj pasuniversitarë në Administrim Biznesi, Menaxhim Projektesh dhe Ligj Biznesi i BE-së.

 

Ai ka përvojë në sektorët e energjisë, industrisë dhe shërbimeve sociale, duke kontribuar në reforma të shërbimeve sociale mbështetura nga Banka Botërore. Që nga viti 2004, Hoxha është pjesë e Programit të Monitorimit të Jashtëm të BE për ndërhyrjet në Ballkan dhe është bashkëthemelues i Qendrës për të Drejtat e Punës, e fokusuar në mbështetje për të drejtat e punëtorëve dhe zgjidhjen e mosmarrëveshjeve.

Kledia Ngjela Anëtar, Këshilli Mbikqyrës KESH

Kledia Ngjela

Kledia Ngjela mban pozitat e Drejtorisë së Përgjithshme Rregullatore dhe Përputhshmërisë në Infrastrukturë dhe Energji që nga viti 2019. Para kësaj, ajo ka qenë Sekretare e Përgjithshme pranë Ministrisë së Mirëqënies Sociale dhe Rinisë, si dhe pranë Ministrisë së Shëndetësisë. Ajo gjithashtu ka mbajtur postin e Drejtoreshës Juridike në Ministrinë e Mirëqënies Sociale dhe Rinisë.

 

Ngjela ka një karrierë të gjatë 25-vjeçare në fushën e legjislacionit dhe shërbimeve juridike. Ajo është diplomuar në Fakultetin Juridik, në degën drejtësi, dhe mban titullin “Master në Studime Europiane”. Gjatë karrierës së saj, ajo ka fituar eksperiencë në hartimin dhe harmonizimin e legjislacionit, këshillimin ligjor, si dhe monitorimin e impaktit të akteve rregullatore. Ajo ka përvojë në fushën e integrimit, koordinimit, marrëveshjeve dhe asistencës, si dhe në proceset e derregullimit, prokurimeve dhe koncesioneve

 

Anëtar, Këshilli Mbikqyrës KESH

Ing. Luigj Pjetri

Ing. Luigj Pjetri ka studiuar për inxhinieri elektrike në HEC Vau Dejes (1969-1977). Ai ka kryer gjithashtu studime të avancuara dhe një master pasuniversitar në Universitetin e Tiranës. Me një karrierë që zgjat më shumë se 55 vjet, ai ka mbajtur pozita të rëndësishme si Drejtor i Ndërmarrjes së Shfrytëzimit të Energjisë në stacionet hidroelektrike (HEC) dhe ka punuar në pozita teknike në sektorin privat dhe publik.

 

Gjatë karrierës së tij, Pjetri ka menaxhuar ndërmarrje pilot të shpërndarjes dhe ka zbatuar programe të eficiencës dhe mirëmbajtjes në sektorin e energjisë. Ai gjithashtu ka vepruar si konsulent teknik për kompani private që fokusohen në menaxhimin e energjisë dhe zhvillimin e projekteve.

Përveç kontributit të tij profesional, ai ka marrë shumë nderime, përfshirë titullin “Mjeshtër i Madh i Punës” dhe medalje për kontributet në industrinë e energjisë. Pjetri ka marrë pjesë në trajnime ndërkombëtare dhe ka kontribuar në projekte të mëdha, duke përfshirë zhvillimin dhe mbikëqyrjen e projekteve hidroelektrike dhe fotovoltaike. Ai gjithashtu ka ndihmuar në menaxhimin e krizave dhe ka kontribuar në planifikimin strategjik për zhvillimin e sektorit të energjisë në Shqipëri.

Anëtar, Këshilli Mbikqyrës KESH

Ylber Muceku

Prof. Ylber Muceku ka studiuar për gjeologji në Fakultetin Gjeologji dhe Miniera (1982-1987), Universiteti Politeknik i Tiranës. Gjatë viteve 1996-1997, ai ka kryer studimet e thelluara pasuniversitare për “Hidrogjeologji dhe Gjeologji Inxhinierike” në Fakultetin e Gjeoshkencave, Universiteti Eberhard Karls Tübingen, Gjermani. Ndërsa, nga vitet 2000-2005, ka punuar dhe ka kryer Ph. D. në Universitetin Politeknik të Tiranës në fushën e gjeologjisë inxhinierike dhe gjeoteknike.

 

Në vitin 2014, ai ka marrë titullin Asociate Profesor dhe në vitin 2021 është emëruar Profesor në Universitetin Politeknik të Tiranës, Shqipëri. Nga viti 2014 deri në vitin 2020, Z. Muceku ka qenë Përgjegjës i Departamentit të Gjeologjisë në Institutin e Gjeoshkencave, dhe nga viti 2020 e në vazhdim është drejtor i Institutit të Gjeoshkencave në Tiranë.

 

Prof. Muceku kryen kërkime shkencore në hartografimet gjeo-inxhinierike dhe gjeoteknike për zhvillime dhe planifikime urbane, rrëshqitjet e shpateve kodrinore dhe malore, vlerësimin e qëndrueshmërisë së shpateve, lëngëzimin e rërave, rreziqet gjeologjike, teknikat e përmirësimit të vetive fiziko-mekanike të dherave, gjeomorfologji, si dhe në vlerësime gjeoteknike të shesheve për ndërtime të objekteve inxhinierike si diga, autostrada, tunele dhe objekte social-kulturore.

Anëtar, Këshilli Mbikqyrës KESH

Olta Manjani

Dr. Olta Manjani ka një eksperiencë të gjatë në fushën e ekonomisë, duke punuar si ekonomiste në Bankën e Shqipërisë nga viti 2008 deri në 2021, në Departamentin e Politikës Monetare. Ajo ka zhvilluar gjithashtu një karrierë pedagogjike si asistent pedagoge në Universitetin Tor Vergata të Romës (2020-2021) dhe pedagoge e jashtme në Universitetin e Tiranës, Fakulteti Ekonomik (2006-2007). Dr. Manjani ka qenë gjithashtu “visiting researcher” në Graduate Institute Geneva në Zvicër (2014-2015).

 

Ajo ka përfunduar studimet e doktoraturës në Bankë dhe Financë në Universitetin Tor Vergata të Romës (2018-2021), si dhe ka kryer studimet pasuniversitare në Williams College, Massachusetts, SHBA, si studiuese e Fulbright me Diplomë Master në Politikat Ekonomike të Vendeve në Zhvillim. Diplomën e saj të Bachelor-it e ka marrë në Universitetin Amerikan të Selanikut në Greqi, në Administrim Biznesi, me një minoren në Marrëdhënie Ndërkombëtare (2002-2006).

 

Dr. Manjani ka disa kualifikime në fushën e financës dhe ekonomisë nga institucione prestigjioze si Banka e Rezervës Federale të Nju Jorkut, Bundesbank në Gjermani, Instituti i FMN-së në Uashington DC dhe Joint Vienna Institute në Austri.

Roport mbi monitorimin e treguesve mjedisorë në HEC Vau i Dejës, HEC Koman dhe HEC Fierzë.

 

Me qëllim përmbushjen e pikës 3.1 “Monitorimi i mjedisit ” të ESAP (Plan Veprimi për Çeshtjet Social Mjedisore) në kuadër të marrëveshjes së nënshkruar ndërmjet KESH sh.a dhe BERZH “Marrëveshje huaje” ndërmjet Korporatës Elektroenergjetike Shqiptare dhe Bankës Evropiane për Rindërtim dhe Zhvillim (BERZH), për projektin “Shqipëria: Plani i ristrukturimit të KESH-it” në periudhën Dhjetor 2017-Janar 2018 u realizua monitorimi i treguesve mjedisorë në njësitë prodhuese të KESH sh.a nga kontraktori “VIELF STUDIO SH.P.K & ECCAT SH.P.K”.

Default PDF Icon

Raporti Fierza Anglisht

Shiko PDF
Default PDF Icon

Raporti Fierza

Shiko PDF
Default PDF Icon

Raporti Koman Anglisht

Shiko PDF
Default PDF Icon

Raporti Koman

Shiko PDF
Default PDF Icon

Raporti VD Anglisht

Shiko PDF
Default PDF Icon

Raporti VD

Shiko PDF

Kalendari Mjedisor 2025

Periudha kohore Përshkrimi i Aktiviteteve
Tremujori I
28 Shkurt - 2 Mars
Ditët Botërore të Energjisë së Qëndrueshme -Energjia e qëndrueshme është forma e fitimit të energjisë nga burime të pashterueshme.
05 Mars
Dita Botërore e Efiçencës së Energjisë
22 Mars
Dita Ndërkombëtare e Mbrojtjes së Ujit
Tremujori II
07 Prill
Dita Botërore e Shëndetit - Aktivitet me temë “Energji e pastër, fëmijë të shëndetshëm“
22 Prill
Dita e Tokës
Tremujori III
4 Korrik
Dita kundër përdorimit të qeseve plastike
21 Shtator
Dita e Emetimeve Zero
Tremujori IV
6 Tetor
Dita Botërore e Habitateve (Burimi: UN /e hëna e pare e Tetorit)
11 Tetor
Dita Botërore e Hidrocentralit *(Burimi : IHA)
24 Nëntor
Dita Ndërkombëtare e Mbjelljes së Pemëve
5 Dhjetor
Dita Ndërkombëtare e Vullnetarizmit

PLANET E GATISHMËRISË NË RASTET E EMERGJENCAVE

Bazuar në ligjin Nr. 8681,datë 02.11.2000 “Për projektimin, ndërtimin, shfrytëzimin dhe mirëmbajtjen e digave dhe dambave”, ligjit Nr.8756, datë 26.03.2001 “Për Emegjencat Civile“, VKM Nr.147 datë 18.03.2004, KESH sh.a, si dhe “Rregullores për Sigurinë e Digave”, neni 28, e miratuar me VKM Nr.147, datë 18.03.2004, KESH sh.a ka hartuar Planet e Gatishmërisë në rastet e Emergjencave.

 

Këto plane janë hartuar në bashkëpunim me ekspertizën vendase dhe të huaj (GNF, Spanjë) dhe në përputhje me rekomandimet e ICOLD dhe standartet ndërkombëtare.

 

Planet e Gatishmërisë në Raste Emergjencash përfshijnë:

 

I. Raportet Teknike sëbashku me anekset përkatëse të tyre.
II. Skemat Organizative për proceset e veprimeve emergjente në 4 skenarë të mundshëm.
III. Hartat e Përmbytjeve që mund të shkaktohen në zonën e pellgut ujëmbledhës Drin-Bunë gjatë operimit të HEC-eve të kaskadës së lumit Drin (Fierzë, Koman dhe Vau i Dejës) apo dëmtimeve të digave të tyre.

 

Gjithashtu, me ndihmën teknike të GIZ janë përgatitur edhe hartat e zonave të përmbytjeve për rastet e shkarkimit të plotave me përsëritje një herë në 100 vjet dhe një herë në 1,000 vjet, harta këto që në përputhje me përcaktimet e Rregullores për Sigurinë e Digave dhe Dambave, janë përgatitur në shkallë 1:25,000

 

Planet e Gatishmërisë në Raste Emergjencash shtjellojnë dhe përcaktojnë për çdo skenar të mundshëm të rasteve të emergjencave që mund të ndodhin (për shkak të operimit dhe menaxhimit të HEC-eve të kaskadës së lumit Drin në kushtet e prurjeve të mëdha, tërmeteve, apo prishjes së mundshme të ndonjë dige), detyrat dhe skemat organizative për lajmërimin në kohën e duhur nga Institucionet e përfshira në proçesin e përballimit dhe menaxhimit të emergjencave civile.

Kodi i Etikës

Kodi etik i KESH sh.a. është pjesë integrale e rregullores së përgjithshme të punës në KESH sh.a. dhe përfaqëson një përmbledhje tërësore të vlerave dhe parimeve, të cilat duhet të udhëheqin punën e përditshme të personelit të KESH. Ky kod kërkon nga punonjësit që punojnë pranë shoqërisë KESH sh.a që të zbatojnë standartet më të larta të sjelljes etike, në përputhje me vlerat e integritetit, të paanshmërisë dhe të maturisë.

 

Punonjësit e shoqërisë KESH sh.a inkurajohen të punojnë me pasion dhe me profesionalizëm për të arritur rezultate sa më të larta e të qendrueshme. Ata duhet të veprojnë me integritet gjatë gjithë veprimtarisë së tyre zyrtare dhe të shmangin çfarëdolloj sjelljeje që mund të paraqesë ndryshe punonjësit ose KESH-in.

 

KESH, me karakterin e vet demokratik, profesional dhe vlerës që i jep diversitetit, KESH orienton stafin e vet që të veprojë me tolerancë, me ndjeshmëri, me respekt dhe me paanësi kundrejt kulturës dhe profesionit të personave të tjerë, që nuk i kanë ato të njëjta me të tjerët. Për stafin e KESH, integriteti duhet kuptuar si sinonim i ndershmërisë, korrektesës, drejtësisë e besnikërisë kundrejt punës dhe institucionit.

 

Nga ana tjetër, KESH reagon ndaj çdo sjelljeje abuzive, e cila do të konsiderohet fyese për ambientin apo për persona konkretë. Punonjësit e KESH duhet të përmbushin detyrat e tyre me kompetencë dhe paanshmëri, duke zbatuar standarte të larta profesionale në kryerjen e punës së tyre dhe duke mbajtur përgjegjësi për materialet e përgatitura.

Siguria dhe shëndeti

Përgjegjësitë e Korporatës Elektroenergjitike Shqiptare për sigurinë dhe shëndetin në punë janë në përputhje me rregulloret dhe normat shtetërore të sanksionuara në Rregulloren e Sigurimit dhe Shfrytëzimit Teknik për Impiantet, Pajisjet dhe Instalimet elektrike. Në zbatim të kësaj rregulloreje, KESH ka bërë parashikmet e veta në strukturën e vet organizative, duke integruar funksionet përkatëse në nivel Qendror dhe Njësi Prodhimi.

 

Qëllimi i sistemit të menaxhimit të sigurisë dhe shëndetit në punë është rritja e sigurisë së punonjësve në ambientet e punës dhe mbrojtja e shëndetit e mirëqenies së tyre dhe personave të tjerë (publikut) që mund të ekspozohen ndaj risqeve të aktivitetit të Korporatës Elektroenergjitike Shqiptare.

 

Rreziqet kryesore ndaj të cilave ekspozohen punonjësit e KESH-it që punojnë direkt në impiantet e prodhimit të energjisë elektrike përfshijnë kryesisht goditjet nga rryma elektrike, goditjet nga eksplodimi i pajisjeve nën presion, rëniet nga lartësia, efektet e lëndëve kimike, biologjike dhe kancerogjene, zhurmat, dridhjet mekanike, fushat elektrostatike, rrezatimet jonizuese dhe optike, etj.

 

Rregullorja e Sigurimit Teknik dhe Mbrojtjes së Shëndetit në Punë sanksionon:

  • Vlerësimin e riskut dhe marrjen e masave të nevojshme (mjete dhe staf kompetent) për trajnimin e punonjësve për sigurinë dhe mbrojtjen në punë, përfshirë dhënien e ndihmës së parë të kualifikuar dhe transportin për në qendrën më të afërt spitalore.
    ● Sigurimim e veglave të punës, pajimeve dhe veshjeve mbrojtëse për punonjësit (çertifikuar sipas normave IP të sigurisë) dhe sigurimin e kushteve të përshtatshme në ambjentet e punës (ventilimin, ngrohjen, ndriçimin e mjaftueshëm, mobilimin, etj)
    ● Përgatitjen dhe instalimin e sinjalistikës për t’i treguar punonjësve çfarë duhet të dinë për ruajtjen e shëndetit dhe sigurinë në punë;
    ● Sigurimin e punonjësve për rastet e aksidenteve në punë përfshirë aksidentet rrugore kur punonjësi udhëton për në vendin e punës si dhe për të prekurit nga sëmundje profesionale.
    ● Regjistrimin dhe raportimin e aksidenteve në punë dhe të prekurit nga sëmundje profesionale si dhe të rasteve të rrezikshme që mund të ndodhin.
    ● Vlerësimin e riskut të dëmtimit të punonjësve nga substancat e rrezikshme dhe vendosjen e tabelave paralajmëruese dhe zbatimin e rregulloreve përkatëse të rekomandauara nga furnizuesi i tyre.

Ndërkohë që njohja dhe zbatimi i rregullave të sigurimit teknik dhe ruajtjes së shëndetit në punë është detyrë e përhershme e përsonelit të KESH sh.a., menaxhimi i Sistemit të Sigurisë dhe Shëndetit në Punë përfshin në vetvete përmirësimin e vazhdueshëm dhe shërbim gjithnjë e më të kualifikuar ndaj të punësuarve në nivelin e kërkesave të kohës.

Kërkesë për regjistrimin

Formulari Ankesave

Apliko për Punë