Mirëmbajtja e Hidro-Agragateve

Edhe gjatë vitit 2018, treguesit e mirëmbajtjes vijojnë të përmirësohen në krahasim me vitet e mëparshëm si dhe me mesataren e 10 viteve të fundit. Krahas situatës së favorshme hidrologjike performanca e mirëmbajtjes është përmirësuar si rrjedhojë e gadishmërisë së lartë të agregatëve për operim, efikasitetit të kontrolleve të vazhdueshme parandaluese, shërbimeve cilësore të mirëmbajtjes gjatë remonteve profilaktike e të mesme, si dhe investimeve për rinovime teknologjike të agregatëve e paisjeve të tjera të tre HEC-eve të kaskadës së Drinit.Gjatë vitit 2018, për shkak të kufizimeve në kapacitetet gjeneruese të disponueshme për shfrytëzim, agregatët kanë realizuar më shumë orë pune krahasimisht me shumicën e 10 viteve të fundit.

Orët e punës së agregatëve janë rritur me 20.1% më shumë krahasuar me mesataren e 10 viteve të fundit, ose 83.8% më shumë se e njëjta periudhë e vitit 2017.

Gadishmëria e agregatëve për operim është rritur me 0.22% krahasuar me mesataren e 10 viteve të fundit ndonëse hidroagregatët gjatë 6-mujorit të I-rë kanë punuar pothuajse pa ndërprerje dhe me regjim maksimal ngarkese duke shfrytëzuar maksimalisht potencialet hidrike të krijuara nga situata e favorshme hidrologjike.

Orët e ndërprerjeve për kohë të shkurter të agregatëve për shkak të anomalive kalimtare, janë ulur në 49 orë, apo mbi 3.4 herë më pak se mesatarja e 10 viteve të fundit.

Për të gjitha rastet e avarive të agregatëve të tre HEC-ve të kaskadës së Drinit, asnjëherë ndalimi i tyre nuk ka rezultuar me kohëzgjatje që imponojnë remonte të parakohshme për riparime kapitale. Shumica e ndalimeve të agregatëve për intervale kohe të shkurtra, kanë ardhur nga anomali të rrjetit të Sistemit Energjitik, i cili përballoi flukset më të larta fizike të energjisë të transmetura ndonjëherë.