Impianti Fotovoltaik Qyrsaq

Impianti fotovoltaik i instaluar mbi digën e Qyrsaqit, në hidrocentralin e Vaut të Dejës, përfaqëson një nga projektet më novatore të realizuara nga Korporata Elektroenergjetike Shqiptare (KESH sh.a.). Ky është projekti i parë në Shqipëri ku panelet diellore janë vendosur mbi sipërfaqen e një dige hidrocentrali, duke kombinuar në mënyrë të zgjuar prodhimin e energjisë nga dy burime të rinovueshme uji dhe dielli.

I vënë në funksion në shkurt 2022, impianti operon me efikasitet të plotë dhe kontribuon në diversifikimin e portofolit të prodhimit të KESH sh.a., duke shtuar një burim të qëndrueshëm dhe miqësor me mjedisin në sistemin energjetik kombëtar. Projekti është zbatuar duke respektuar të gjitha standardet teknike dhe kërkesat që lidhen me sigurinë e digës dhe me ruajtjen e integritetit të veprave hidrike ekzistuese.

Ky investim përbën një hap të rëndësishëm drejt tranzicionit të gjelbër të sektorit energjetik në Shqipëri dhe shërben si model për nisma të tjera që synojnë shfrytëzimin e potencialeve të burimeve të rinovueshme në mënyrë efikase e të qëndrueshme.

OBJEKTIVAT KRYESORE TË ZHVILLIMIT TË PROJEKTIT

Diversifikimi i burimeve të prodhimit të energjisë elektrike

KESH sh.a. prodhon tradicionalisht energji elektrike 100% nga burimet hidrike.Ky projekt përfaqëson një hap strategjik drejt zgjerimit të teknologjisë fotovoltaike dhe përdorimit të sipërfaqeve të pashfrytëzuara për prodhimin e energjisë së pastër. Ai tregon se është e mundur të kombinohen në mënyrë efektive burime të ndryshme të energjisë së rinovueshme, duke përmirësuar qëndrueshmërinë e sistemit.

Rritja e sigurisë së furnizimit me energji

Për shkak të varësisë nga kushtet hidrike, sektori energjetik shqiptar përballet me rrezik të lartë hidrologjik dhe nevojë të përvitshme për importe energjie. Projekti i Qyrsaqit kontribuon në rritjen e sigurisë së furnizimit dhe në uljen e varësisë nga kushtet klimatike. Energjia e prodhuar nga ky impiant mjafton për të furnizuar rreth 1,900 familje shqiptare çdo vit me energji të pastër, duke reduktuar njëkohësisht ndikimin mjedisor dhe kostot e sektorit.

Kontribut në zbatimin e Strategjisë Kombëtare të Energjisë dhe Strategjisë për Eficiencën e Energjisë

Zhvillimi i këtij projekti është në përputhje me objektivat e Strategjisë Kombëtare të Energjisë dhe të Strategjisë për Eficiencën, të cilat synojnë diversifikimin e burimeve të prodhimit dhe reduktimin e emetimeve të karbonit. Modeli i KESH tregon se investimet në energji të pastër janë ekonomikisht të përballueshme, me kthim të sigurt dhe ndikim pozitiv në mjedis e ekonomi.

Krijimi i njohurive dhe eksperiencës për projekte të ngjashme

Përvoja e fituar nga KESH me këtë projekt krijon një bazë të fortë teknike dhe institucionale për zhvillimin e projekteve të ardhshme fotovoltaike. Potenciali për instalime të ngjashme në struktura ekzistuese si diga, çati apo toka të pashfrytëzuara është i lartë dhe përfaqëson një mundësi të vlefshme për investime publike dhe private.

Shfrytëzimi efikas i hapësirave pa cënuar mjedisin

Digat e rezervuarëve janë vende optimale për instalime fotovoltaike për shkak të strukturës së tyre dhe orientimit të përshtatshëm. Projekti i Qyrsaqit demonstron se është e mundur të përdoren në mënyrë efikase sipërfaqe të pashfrytëzuara, pa pasur nevojë për ndërhyrje civile të thelluara dhe pa ndikuar negativisht në veprat hidrike apo në mjedis.

Kombinimi i energjisë nga uji dhe dielli

Ky projekt ofron një shembull të qartë të mënyrës sesi bashkëjetesa e dy burimeve të rinovueshme hidrike dhe diellore mund të rrisë fleksibilitetin dhe efikasitetin e prodhimit të energjisë. Kombinimi i këtyre burimeve ndihmon në sigurimin e prodhimit të qëndrueshëm gjatë gjithë vitit dhe në forcimin e qëndrueshmërisë së sistemit energjetik kombëtar.

Impianti Fotovoltaik në Digën e Qyrsaqit është më shumë se një investim teknik ai është një simbol i angazhimit të KESH sh.a. për tranzicionin energjetik të gjelbër dhe për ndërtimin e një të ardhmeje të qëndrueshme për Shqipërinë.